Ел дамуының жаңа кезеңіне аяқ басқалы әділетті қоғам ұстынын бекіте түсуге ұмтылыс жасалып, ұлт саулығына ерекше көңіл бөлініп келеді.
Бұл ретте табыстың әділ бөлінуін, көмекке мұқтаж кез келген азаматтың мемлекет пен қоғамнан ұдайы қолдау көруін назарға алған Президент Қасым-Жомарт Тоқаев «Қазақстан халқына» қоғамдық әлеуметтік қорының құрылуына бастамашы болды. Бүгінде денсаулығын дерт меңдеген жандар осы қор арқылы мемлекеттің демеуін сезініп жүр. Бұған қоса қаншама мұқтаж адам қомақты ақшалай қолдау көрді.
Бүгінгі таңда қорға ірі компаниялардан, жеке қайырымдылық қорлар мен ұйымдардан, меценаттар мен жеке тұлғалардан – жалпы 79 мың донордан 131,7 млрд теңге түскен. Қордың Қамқоршылық кеңесі мақұлдаған бағдарламалар мен жобалардың жалпы құны 60 млрд теңгені құраса, оның 25,5 млрд теңгесі қайырымдылық көмек ретінде жұмсалып отыр.
Қор денсаулық сақтау мен әлеуметтік қолдау, білім, спорт салалары және төтенше жағдай кезінде көрсетілетін көмек аясында да 20-дан аса қайырымдылық бағдарламасы мен жобасын іске асырып жатыр. Қайырымдылыққа қатысты барлық ақпарат, қаржылық есептер, түсім, қаражат жібергендердің тізімі, жұмсалған қаржының бағыты қор сайтында ашық көрсетілген.
