Түркістан облыстық мәслихатының депутаты, әлеуметтік-мәдени даму, мемлекеттік-құқық, жергілікті өзін-өзі басқару және депутаттық этика мәселелері жөніндегі тұрақты комиссия төрағасы Алмас Салимов, бүгін Түркістан облыстық мәслихатының Шымкент қаласындағы өкілдігінде қоғамдық қабылдауын өткізді.
Мәселесін арқалап, өтініш-тілегін айтып келушілер проблемаға айналған тұрғын-үй, әлеуметтік, инфрақұрылым жәйында сөз көтерді.
Соның бірі, Қалдыбек Ысқақов есімді тұрғын Төлеби ауданы, Жаңа жол елді мекеніндегі “Жаңа жол” орта мектебіне ҰОС ардагері Көшербай Ысқақовтың есімін беру жөнінде мәселесін айтып келді. Халық қалаулысы Алмас Алтайұлы, қабылдау барысында облыстық мәдениет басқармасының басшысы Ә.Қойлыбаевқа хабарласып, мәселенің оң шешілуі бойынша ақпарат алды.
Анық болғандай, ең алдымен аталған білім ошағын ономастикалық жұмыс барысында басшылыққа алатын «Тарихи тұлғалар» тізіміне енгізу қажеттілігі туындаған. Осыған орай, қазіргі таңда облыстық ономастика комиссиясында қаралып, аталған тізімге енгізу үшін ҚР Мәдениет және ақпарат министрлігіне ұсынылған. Ұсыныс республикалық жұмысшы топтың талқылауында екендігі айтылды.
Бұдан өзге, Тұрғын — үй мәселесі бойынша келген тұрғынға депутат, ұсынысы заң аясында қаралатындығын айтып түсіндірді.
