Түркістан облысының әкімі Нұралхан Көшеров Иран Ислам Республикасындағы «Sorena Carpet» компаниясының президенті Реза Махмудианмен кездесті. Кілем және кілем өнімдерін шығаратын алып компания басшысымен кездесуде екіжақты әріптестікті нығайту, кілем фабрикасын ашу жөнінде ұсыныстар беріліп, келіссөздер жүргізілді. Өңір басшысы Түркістан облысында инвесторларға қолайлы жағдай жасалғанын атап өтті.
– Түркістан облысы мен Иран Ислам Республикасының арасындағы екі жақты ынтымақтастығының дамуы өте маңызды екенін атап өткім келеді. Қазақстан-Иран елдері арасындағы ынтымақтастық негізінде сауда-экономикалық, өнеркәсіптік және ғылыми бағытында ынтымақтастықты дамытуға мүмкіндік бар. Сіздер ұсынып отырған жобаның маңызы өте жоғары. Былтыр қазақстандық кәсіпорындар 5,1 млн. шаршы метр кілем өнімін шығарды. Дегенмен ауқымды дей алмаймыз. Облысқа кілем негізінен Түркия, Ресей және Қытайдан жеткізіледі. Еліміздің ішкі нарығының кілем бұйымдарына деген қажеттілігінің 75%-дан астамы импортталады. Сондықтан аймақта кілем фабрикасын ашу тиімді болмақ. Ортақ келісімге келсек, қолдау көрсетуге дайынбыз, – деді Нұралхан Көшеров.
Ирандық инвестор компаниясының әлеуетімен таныстырып, жоспарларын баяндады. Түркістан облысында жобаларының бірін жүзеге асыруға ниетті екенін жеткізді. Бұл бағытта келіссөздер жалғасады.
