12 тамыз – Халықаралық жастар күніне орай Сауран ауданы әкімдігі ішкі саясат бөлімінің «Жастар ресурстық орталығы» КММ-нің ұйымдастыруымен Шорнақ ауылдық округінде «Жалынды жастар – ел ертеңі» атты салтанатты мерекелік кеш өтті.
Шараның басты мақсаты – жастарды қолдау, олардың шығармашылық әлеуетін арттыру, қоғамдық өмірге белсенді араласуына жол ашу және жастар мерекесін жоғары деңгейде атап өту.
Мерекелік кештің шымылдығын Сауран ауданы әкімінің орынбасары Букебаев Бақытжан Кеңесбекұлы ашып, өз құттықтауында:
> «Жастар – қай заманда да елдің асқақ арманы мен үмітінің, биік ары мен өр намысының символы. Сіздердің әрқайсыңыздың белсенділігіңіз, білімге, жаңа идеяларға ұмтылысыңыз – ауданымыздың және еліміздің болашағының кепілі» – деп атап өтті.
Келесі сөз алған кеш қонақтары – облыстық мәслихат депутаты Б.Сүлейменов, Сауран аудандық мәслихат депутаттары А.Раматуллаев, Х.Шарапов жастардың мемлекетіміздің жаңа келбетін қалыптастырудағы рөлін ерекше бағалап, 12 тамыз – Халықаралық жастар күні болып күнтізбеге енгізілуінің тарихи және тәрбиелік маңызын атап өтті. Олар аудан жастарына ізгі тілектерін білдіріп, мерекемен құттықтады.
Сонымен бірге, шара барысында Сауран аудандық жастар орталығының жұмысы мен атқарған жобаларына жоғары баға берілді.
Мерекелік кештің мәдени бағдарламасында ауданның талантты жастары мен өнерпаздары әсем әндер шырқап, әсерлі билер билеп, мәнерлеп өлең оқып, түрлі шығармашылық нөмірлер орындады. Шараның ажарын ашқан сахналық көріністер мен өнер туындылары көрермендер көңілін бір серпілтіп, мерекелік шаттық сыйлады.
Кеш соңында қатысушылар бір-біріне естелік суретке түсіп, игі тілектерін білдірді. Ал финалда өткен көңілді ойындар мен әсем от шашу мерекенің көркін қыздырып, жиналған жұртқа ұмытылмас әсер қалдырды.
Жастар үшін бұл күн жарқын естелікке айналып, олардың бойында отансүйгіштік сезім мен жаңа жетістіктерге жету ынтасын арттырды.
