Түркістан облыстық мәслихатының Шымкент қаласындағы өкілдігінде облыстық мәслихат депутаты, әлеуметтік-мәдени даму, мемлекеттік-құқық, жергілікті өзін-өзі басқару және депутаттық этика мәселелері жөніндегі тұрақты комиссия төрағасы Алмас Салимов азаматтарға жеке қабылдау өткізді.
Қабылдауға жазылған тұрғындар жеке шағын шаруашылықпен айналысатын азаматтарға мемлекет тарапынан қаржылай қолдау көрсету мәселесіне қатысты бірқатар ұсыныстарын ортаға салды. Өтініш иелеріне көтерілген мәселелерге байланысты көрсетілетін мемлекеттік қолдау түрлері жөнінде жан-жақты түсіндірме берілді.
Сонымен қатар қабылдауға келген азаматтар жер учаскесіне кезекке тұру және балалар ойын алаңшаларына қатысты мәселелерді көтерді. Аталған сұрақтар бойынша тұрғындарға қолданыстағы заңнама аясында толық ақпарат ұсынылды.
Айта кетейік, Түркістан облыстық мәслихатының депутаттары азаматтарды жеке қабылдауды тұрақты түрде жүргізіп, тұрғындардың түйткілді мәселелерін шешуге бағытталған жүйелі жұмыстарды жалғастыра береді.
