Бүгін Қытай Халық Республикасының Гуанчжоу қаласында әлемдегі ең ауқымды әрі беделді көрмелердің бірі – Кантон жәрмеңкесінің 139-шы маусымы өз жұмысын жалғастыруда. Халықаралық деңгейдегі бұл ірі алаңда заманауи технологиялар, озық инновациялық жобалар мен өндірістің жаңа бағыттары кеңінен таныстырылып, әлем елдерінің назарын аударуда.
Аталған маңызды іс-шараға “Ауыл” партиясының Түркістан облысы бойынша өңірлік филиалының төрағасы, облыстық мәслихат депутаты Қалмұратов Төрегелді Оразалыұлы арнайы қатысып, жаһандық технологиялық жетістіктермен жақын танысты. Ол көрме барысында түрлі салалардағы инновациялық шешімдер мен өндірістік тың бастамаларды зерделеп, олардың өңір экономикасына енгізу мүмкіндіктерін қарастырды.
Халықаралық тәжірибе алмасудың тиімді платформасына айналған Кантон жәрмеңкесі ауыл шаруашылығы мен өндіріс салаларына тың серпін беріп, жаңа мүмкіндіктерге жол ашары сөзсіз. Әлемдік тәжірибені игеру арқылы отандық өндірісті дамыту мен бәсекеге қабілеттілікті арттыруға зор ықпал ететін бұл көрменің маңызы айрықша.
Қалмұратов Төрегелді Оразалыұлының айтуынша, көрме жоғары деңгейде ұйымдастырылған және ұсынылған жобалардың ауқымы мен сапасы ерекше әсер қалдыруда. Халық қалаулысы халықаралық алаңдағы жаңашыл бастамаларға оң бағасын беріп, олардың болашақта еліміздің әлеуметтік-экономикалық дамуына серпін беретінін атап өтті.
