Түркістан қаласындағы «Түркістан арена» стадионында 22 сәуір күні «Қажымұқан атындағы Түркістан облысының белбеу күресі федерациясы» қоғамдық бірлестігінің кезектен тыс мәжілісі өтті. Жиынға Түркістан облысының дене шынықтыру және спорт басқармасының басшысы Ғалымжан Худияров төрағалық етті.
Мәжіліс барысында өңірде белбеу күресін дамыту жұмыстары талқыланды. Қазіргі таңда бұл спорт түрі облыстың 8 мекемесінде дамып, 22 жаттықтырушы 437 спортшымен тұрақты түрде оқу-жаттығу жұмыстарын жүргізуде.
Күн тәртібіндегі негізгі мәселе – қоғамдық бірлестіктің Президентін сайлау болды. Осыған байланысты Түркістан облыстық мәслихатының депутаты, кәсіпкер, Ордабасы ауданының тумасы Ғани Раймбеков кандидатурасы ұсынылды.
Дауыс беру қорытындысы бойынша қатысушылар бірауыздан қолдау білдіріп, Ғани Ахылбекұлы «Қажымұқан атындағы Түркістан облысының белбеу күресі федерациясы» қоғамдық бірлестігінің Президенті болып сайланды.
Жиында алғаш болып құттықтау сөз сөйлеген басқарма басшысы Ғалымжан Батырханұлы жаңа Президентке сәттілік тілеп, өңірде белбеу күресін дамыту бағытында бірлескен жұмыстардың жалғасатынын атап өтті.
Өз кезегінде жаңадан сайланған Президент Ғани Раймбеков көрсетілген сенім үшін алғысын білдіріп, алдағы уақытта белбеу күресін дамытуға, спортшыларға жан-жақты қолдау көрсетуге және спорт инфрақұрылымын нығайтуға бар күш-жігерін салатынын жеткізді.
Мәжіліс қорытындысы бойынша алдағы кезеңге арналған нақты міндеттер айқындалып, федерация жұмысының жаңа даму кезеңі бастау алды.
