Түркістан қаласында өскелең ұрпаққа арналған жаңа ұлттық анимациялық жоба – «Түркістан сақшылары» мультфильмінің тұсаукесері өтті, деп хабарлады «Aqparatinfo.kz» сайты.
Шараға Түркістан облысы әкімінің орынбасары Ертай Алтаев, Түркістан облыстық мәслихатының төрағасы Нұралы Әбішов, облыс прокурорының орынбасары Даулет Тлемисов, сондай-ақ жоба авторлары, продюсері мен режиссері қатысып, мультфильмнің идеясы мен маңыздылығына тоқталды.
Мультфильмнің жалпы ұзақтығы – 50 минут. Анимациялық туынды өскелең ұрпақты тәрбиелеу, тарихи сананы қалыптастыру, ұлттық құндылықтарды насихаттау және оларды цифрлық дәуірге бейімдеу мақсатында әзірленген. Сонымен қатар жоба «Заң және тәртіп» қағидаттарын ілгерілету аясында жүзеге асырылып, жас буынның құқықтық мәдениетін қалыптастыруға бағытталған.
Аталған жоба Қазақстанда жарияланған Цифрландыру және жасанды интеллект жылы аясында жүзеге асырылды. Заманауи технологиялардың мүмкіндіктері қолданылып, балаларға арналған мазмұн жаңа форматта ұсынылды. Мултьфильмді «Turkistan» телеарнасы әзірлеген. Бас продюсер – Уәли Қыдыр, жоба және идея авторы – Ғасыр Құралбайұлы, режиссер –Еркебұлан Шуашов.
