Құрметті отандастар!
Сіздерді 1 мамыр – Қазақстан халқының бірлігі күнімен шын жүректен құттықтаймын!
Бұл – татулық пен тұрақтылықтың, өзара сыйластық пен шынайы ынтымақтың символына айналған айрықша мереке. Тағдыр тоғыстырған, тарихы тамырлас көпұлтты халқымыздың бірлігі мен берекесін айшықтайтын бұл күн – бейбіт өмірдің қадірін терең ұғындыратын, елдік сананы жаңғыртатын қастерлі мереке.
Кең-байтақ қазақ жерінде сан түрлі ұлт пен ұлыс өкілдерінің бір шаңырақ астында тату-тәтті өмір сүруі – тәуелсіз Қазақстанның ең үлкен жетістіктерінің бірі. Бұл – ғасырлар бойы қалыптасқан кеңпейілділік пен бауырмалдықтың, өзара құрмет пен сенімнің жарқын көрінісі. Ұлы дала төсінде түрлі мәдениеттер мен дәстүрлердің үйлесім табуы – мемлекетіміздің рухани байлығын еселеп, оның бірегей болмысын қалыптастырып отыр.
Ұлы ойшыл Абай Құнанбайұлы «Адамзаттың бәрін сүй, бауырым деп» деп, барша жұртты татулық пен адамгершілікке үндесе, Әбу Насыр әл-Фараби «Ізгі қоғам – өзара көмек пен түсіністікке негізделген қоғам» деп, бірлік пен келісімнің маңызын айқын көрсеткен.
Бүгінгі таңда Қазақстан – әлемге бейбітшілік пен келісімнің мекені ретінде танылған ел. Бұл – әрбір азаматтың бір-біріне деген құрметі мен жанашырлығының, ортақ Отан алдындағы жауапкершілігінің нәтижесі. Бізді біріктіретін – ортақ мақсат, ортақ тағдыр, ортақ болашақ.
Бірлік – тек мерекелік ұғым емес, ол – күнделікті өмір салтымыз, ортақ құндылығымыз. «Бірлік болмай, тірлік болмас» деген халық даналығы әрдайым жолбасшымыз болуы тиіс. Себебі тек ынтымақ пен өзара сенім бар жерде ғана даму мен өркендеу болады. Ортақ мүдде жолында жұмылған жұдырықтай болу – біздің басты міндетіміз.
Қазіргі таңда елімізде жүзеге асырылып жатқан жаңғырулар мен игі бастамалар да осы бірліктің арқасында табысты жүзеге асуда. Бұл үдерістер елдігімізді нығайтып, болашаққа деген сенімімізді арттыра түседі. Әрқайсымыз қоғамдағы келісім мен тұрақтылықты сақтауға өз үлесімізді қосқанда ғана, Қазақстанның келешегі кемел, тұғыры биік болмақ.
Осы айтулы мереке күні баршаңызға зор денсаулық, еңбектеріңізге табыс, әр шаңыраққа шаттық пен береке тілеймін!
Еліміз аман, жұртымыз тыныш болсын!
Бірлігіміз бекем, ынтымағымыз жарасымды болсын!
Келешегіміз кемел, болашағымыз баянды болсын!
Ізгі тілекпен,
Түркістан облыстық мәслихат депутаты Жомарт Абдибаев!
