Түркістан өңірінде балалардың құқықтарын қорғау, олардың қауіпсіздігін қамтамасыз ету және салауатты орта қалыптастыру бағытындағы жұмыстар жүйелі түрде жүргізілуде. Облыста білім беру ұйымдары, құқық қорғау органдары, денсаулық сақтау және әлеуметтік қызмет мекемелері бірлесіп, профилактикалық шараларды, кездесулер өткізуді күшейтіп келеді. Осыған орай, 1 маусым – Халықаралық балаларды қорғау күні аясында Түркістан облысында «Жарқын болашақ – бақытты баладан басталады» тақырыбында балалармен кездесу өтті. Іс-шара барысында Түркістан облысы әкімінің орынбасары Еркебұлан Дауылбаев халықаралық және республикалық білім, ғылым, өнер және спорт додаларында жеңімпаз атанған 40 оқушымен дөңгелек үстел форматында жүздесті.
Кездесуде облыс әкімінің орынбасары жас дарындарды мерекемен құттықтап, олардың жетістіктері өңірдің ғана емес, елдің мақтанышы екенін атап өтті.
– Бүгін сіздермен осылай еркін форматта жүздесіп, ашық әңгімелесуге келгеніме өте қуаныштымын. Қасиетті Түркістан өңірі – ежелден білім мен ғылымның, мәдениеттің ошағы. Ал бүгінгі таңда сол тарихи мекеннің атын халықаралық, республикалық деңгейде танытып жүрген сіздер секілді жастарды көргенде, облысымыздың, еліміздің болашағы сенімді қолда екеніне нық сенемін. Әкімдік тарапынан біз сіздердің сапалы білім алып, спортта да, өнер мен ғылымда да биіктерді бағындыруларыңыз үшін барынша жағдай жасауға тырысып жатырмыз. Бізге сіздердің де ойларыңыз, бүгінгі заманауи білім беру трендтеріне көзқарастарыңыз өте маңызды. Алға қойған мақсатқа жету үшін ең алдымен білім алу керек. Үнемі ізденіп, үйреніп, оқудан жалықпау қажет. Кез келген жетістік табандылық пен еңбекқорлықты талап етеді. Әр қадамдарыңызды ойланып басып, уақыттарыңызды тиімді жоспарлай біліңіздер. Ата-анасының батасын алған баланың жолы ашық болады. Сол себепті ата-ананың ақ батасын алып, олардың үмітін ақтауға ұмтылыңыздар. Армандарыңыз айқын, мақсаттарыңыз биік болсын! Бүгінгі күнді бағалап, болашаққа нық қадам басыңыздар. Ал сол армандарға жетудің басты кепілі – денсаулық. Дендеріңіз сау, отбасыларыңыз аман болсын! Барлықтарыңызға сәттілік, мол табыс және жарқын болашақ тілеймін! – деді Еркебұлан Дауылбаев.
Еркін пікір алмасу алаңында оқушылар өздерінің жетістіктері мен болашақ жоспарлары туралы ой бөлісіп, білім алу, кәсіби бағдар, көшбасшылық қасиеттерін дамыту және жеке жетістікке жету жолдары төңірегінде пікір алмасты. Сондай-ақ «ашық микрофон» алаңында көкейлеріндегі сауалдарын қойып, жауаптарын алды.
Кездесу барысында балалардың ұсыныстары мен бастамалары тыңдалып, олардың жан-жақты дамуына қолдау көрсету бағытындағы жұмыстар сөз болды. Жас буынның білім мен ғылымға, шығармашылық пен ізденіске деген қызығушылығын арттыруға бағытталған мұндай кездесулердің маңызы ерекше екені айтылды.
Мерекелік іс-шара соңында облыс әкімінің орынбасары дарынды оқушыларға ізгі тілектерін жеткізіп, олардың алдағы уақытта да биік белестерді бағындырып, ел дамуына үлес қосатын білікті азамат болып қалыптасатынына сенім білдірді.
Кездесуідің әдемі қорытындысы ретінде Түркістан қаласы Өнер мектебінің оқушысы, қазақтың қасиетті домбырасын өзіне серік қылған, жақында ғана Астана қаласында өткен «Сөз бен саз» республикалық байқауының жеңімпазы Рахым Иманәлі арнау тарту етті.
Айта кетейік, Түркістан облысының білім басқармасы ата-аналарды балалардың қауіпсіздігіне бейжай қарамауға, олардың бос уақытын бақылауда ұстауға шақырады. Баланың қауіпсіздігі – баршамызға ортақ жауапкершілік. Жасөспірімдердің психологиялық саулығын нығайту мақсатында мектептерде психологтар, әлеуметтік педагогтар, сынып жетекшілері және мектеп инспекторларының қатысуымен кешенді жұмыстар атқарылуда. Сонымен қатар, қауіп-қатер тобындағы балаларды ерте анықтап, оларға қажетті психологиялық және әлеуметтік қолдау көрсету тетіктері жетілдірілуде. Балалардың қауіпсіз ортада өсіп-жетілуі – қоғамның ортақ міндеті. Осы бағыттағы жұмыстардың нәтижелі болуы ата-аналар, ұстаздар және қоғам мүшелерінің бірлескен жауапкершілігіне байланысты. Түркістанда әр баланың амандығы мен болашағы басты құндылық ретінде қарастырылып, олардың құқықтары мен қауіпсіздігін қорғау бағытындағы жұмыстар алдағы уақытта да жалғасын табады. Сонымен қатар, Түркістан облысында балалардың жан-жақты дамуына қолайлы жағдай жасау, дарынды оқушыларды қолдау, олардың шығармашылық және зияткерлік әлеуетін дамыту бағытындағы жұмыстар жүйелі түрде жалғасуда. Өйткені бүгінгі білімді, талантты әрі белсенді ұрпақ – еліміздің жарқын болашағы мен тұрақты дамуының басты кепілі.
