Сауран ауданында бұқаралық спортты дамыту мен салауатты өмір салтын насихаттауға бағытталған мемлекеттік мекемелер арасында ұйымдастырылған кіші футбол лигасының алғашқы ойындары басталды. Спорттық шара мемлекеттік қызметкерлер арасында бұқаралық спортты дамытуға, салауатты өмір салтын насихаттауға және ұжымдар арасындағы ынтымақтастықты нығайтуға бағытталған.
Жарысқа Сауран аудандық әкімдігі, аудандық емхана, Ұлттық қауіпсіздік комитеті, полиция бөлімі, аудандық мәслихат, «Мансап» орталығы, білім бөлімі, төтенше жағдайлар қызметі және Кадастр — ХҚКО командалары қатысып, жасыл алаңда өзара бақ сынайды. Бұл жарыс қатысушылардың шеберлігін шыңдап қана қоймай, ұжым арасында достық пен ұйымшылдықты нығайтуға, футбол мәдениетін дамытуға үлкен серпін береді. Алғашқы тур кездесулері Шорнақ ауылында ұйымдастырылды. Алдағы уақытта жарыс өз жалғасын тауып, турнир қорытындысы бойынша үздік командалар мен үздік ойыншылар анықталатын болады. Алдағы кездесулердің тартысты өтіп, әр командаға сәттілік серік болсын! Жанкүйерлерді қызықты ойындар мен жарқын жеңістер күтіп тұр. Сауранда спорт – салауатты өмір салтының жарқын көрінісі!
Айта кетейік, Сауран ауданында «Бұқаралық және спорт түрлерін дамыту» клубындағы спорт нұсқаушылары жалпы білім беретін мектептердегі 9150 баланы спорттық үйірмелермен қамтып отыр. Ауданға қарасты 2 спорт клубы бар. «Сауран спорт клубы», «Бұқаралық спорт түрлерін дамыту» бойынша қазіргі таңда 612 жаттығушы және 42 қызметкер бар. Спорттық инфрақұрылымды дамыту мақсатында тамыз айында аудан орталығы Шорнақ ауылында «Ауыл-Ел бесігі» жобасы аясында салынған спорт кешен мен Майдантал ауылдық округі Ынталы елді мекеніндегі спорт кешені халық игілігіне беру жоспарлануда.
