Кентау қаласының әкімі Жандос Тасовтың төрағалығымен кезекті аппараттық жиын өтіп, қала дамуының негізгі бағыттары бойынша атқарылып жатқан жұмыстар сараланды. Жиынның күн тәртібінде 2026 жылдың І жартыжылдығының қорытындысы бойынша рейтингтік көрсеткіштердің орындалу барысы қаралды. Мемлекет басшысы Қасым-Жомарт Тоқаев мемлекеттік басқару жүйесінде нақты нәтижеге қол жеткізу, атқарушылық тәртіпті күшейту, халықтың талап-тілегіне жедел ден қою және әрбір қабылданған шешімнің тиімділігін арттыру міндеттерін үнемі алға қойып келеді. Осы бағытта жиында қала әкімінің орынбасарлары жетекшілік ететін салалар бойынша атқарылған жұмыстардың нәтижелерін баяндап, негізгі индикаторлардың орындалу деңгейін таныстырды. Сонымен қатар, жоспарлы көрсеткіштердің орындалуына кедергі келтіріп отырған мәселелер мен оларды шешу жолдары талқыланды.
Қала әкімі әрбір бағыт бойынша жұмысты жеке саралап, төмен көрсеткіштердің себептеріне назар аударды. Жауапты бөлім басшыларына анықталған кемшіліктерді жою, көрсеткіштердің орындалуын қамтамасыз ету және белгіленген міндеттердің нәтижелі орындалуына қатысты нақты тапсырмалар берілді. Бүгінде рейтингтік көрсеткіш – жай ғана сандық есеп емес. Ол мемлекеттік органдар жұмысының нақты нәтижесін, халықтың өмір сапасына әсер ететін өзгерістердің деңгейін және қабылданған шешімдердің тиімділігін көрсететін маңызды өлшем. Сондықтан Кентау қаласында әрбір мемлекеттік органның жұмысы нақты нәтижеге, ашықтыққа және жауапкершілікке негізделуі тиіс. «Халық үніне құлақ асатын мемлекет» қағидаты – халықтың мәселесін тыңдаумен ғана шектелмей, оның шешімін нақты қамтамасыз етуді талап етеді. Осыған сәйкес қала әкімдігі алдағы кезеңде де тұрғындардың өзекті мәселелерін шешуге, мемлекеттік қызметтердің сапасын арттыруға және белгіленген индикаторлардың толық орындалуына басымдық береді. Жиын қорытындысымен жауапты басшыларға тиісті тапсырмалар беріліп, олардың орындалуын бақылау міндеттелді.
