Түркістан қаласында жолдардың күтімі мен қауіпсіздігіне ерекше мән берілуде. Бұл бағытта қалалық әкімдіктің Жолаушылар көлігі және автомобиль жолдары бөліміне қарасты «Түркістан жол қызметі» коммуналдық мекемесі нәтижелі жұмыстар атқарып келеді.
Мекеме қала көшелеріне жарық шамдарын орнатып, жол белгілерін жаңартып, көлік қозғалысының қауіпсіздігін қамтамасыз етуге атсалысуда. Көпшіліктің көзіне жиі түсе бермейтінімен, олардың еңбегі қаланың тыныс-тіршілігінде маңызды рөл атқарады.
Қазіргі таңда мекеменің өз өндірістік базасы мен 10 арнайы техникасы бар. Бұл жұмыстарды жүйелі жүргізуге және қала бойынша қызмет көлемін арттыруға мүмкіндік береді.
Мекеме басшысы Қалмырзаев Бағдат ұжым жұмысының негізгі бағытына тоқталып:
– Біздің басты міндетіміз – қала тұрғындары мен қонақтарының жолда өздерін қауіпсіз сезінуін қамтамасыз ету. Түркістан – тарихи, дамып келе жатқан қала. Сондықтан инфрақұрылымға қатысты кез келген мәселені уақытылы әрі сапалы шешу – біздің ортақ міндетіміз, – деп атап өтті.
Тыныш еңбектің нәтижесі – жарық көшелер, айқын жол белгілері және қауіпсіз қозғалыс. Түркістанның жол инфрақұрылымын жақсартуға үлес қосып жүрген мамандардың еңбегі осының айғағы.
