Мемлекет басшысы экономиканы әртараптандыру және инвестиция тарту бойынша нақты міндеттер жүктеген. Осыған сәйкес облыс әкімінің тапсырмасымен өңір экономикасына терең талдау жүргізіліп, әр аудан мен қаланың экономикалық ерекшелігі, шикізаттық әлеуеті, өндірістік мүмкіндігі, импортқа тәуелділігі мен ішкі нарық сұранысы жан-жақты сараланған. Айта кетейік, биылғы алғашқы алғашқы айларында облыстың қысқа мерзімді экономикалық өсімі 125 пайызды құрап, республика бойынша бірінші орынға шықты. Ал, 2026 жылдың алғашқы бес айының қорытындысы бойынша Түркістан облысына 143 100 турист саяхаттап келген. Бұл өткен жылдың сәйкес кезеңімен салыстырғанда 15,6 пайызға артық. Саяхатшылардың 77,8 пайызы – отандық туристер болса, 22,2 пайызын шетелдік қонақтар құрайды. Бұл туралы облыс әкімі Нұралхан Көшеровтің төрағалығымен өткен жиында баяндалды. Сондай-ақ жиын барысында жыл басынан бері атқарылған жұмыстардың қорытындылары мен негізгі көрсеткіштері сараланып, алдағы жобалар таныстырылды.
Жиында облыс әкімі Нұралхан Оралбайұлы туризм саласы өңір экономикасының негізгі драйверлерінің бірі екенін атап өтіп, жауапты тұлғаларға нақты тапсырмалар жүктеді.
– Туристік нысандардағы сервистік қызмет сапасын арттыруды, туристік бағыттарды әртараптандыруды, гидтерді даярлау және қайта даярлау жұмыстарын күшейтуді, инвестициялық жобаларды уақытылы іске асыруды тапсырамын. Өйткені бұл өңірдің әлеуметтік-экономикалық дамуына әсер етеді. Сонымен қатар халықаралық және ішкі туристер ағынын ұлғайту мақсатында өңірдің туристік әлеуетін шетелдік және отандық нарықтарда кеңінен насихаттау, цифрлық платформалар арқылы жарнамалық жұмыстарды жандандыру қажет, – деді облыс әкімі.
Жиында «Open Turkistan» туристік ақпараттық орталығының директоры Асқар Абубакировтың баяндамасы тыңдалды. Оның айтуынша, жыл басынан бері Түркістан облысына 31 823 шетелдік турист келген. Бұл көрсеткіш өткен жылдың сәйкес кезеңімен салыстырғанда 34,2 пайызға жоғары. Шетелдік қонақтардың басым бөлігі Өзбекстан, Қытай, Түркия, Ресей, Қырғызстан, Франция, Германия, Ұлыбритания, Жапония және Оңтүстік Корея мемлекеттерінен келген. Бұл Түркістан облысының халықаралық туристік бағыт ретіндегі тартымдылығының артып келе жатқанын көрсетеді.
Өңірдегі ерекше қорғалатын табиғи аумақтар мен табиғи демалыс орындарына келушілер саны да өсуде. Есепті кезеңде табиғи аумақтарда 60 100 адам демалып, көрсеткіш 2,1 пайызға артты. Ал туризм саласына тартылған инвестиция көлемі 36,3 млрд теңгені құрап, өткен жылдың сәйкес кезеңімен салыстырғанда екі есеге өсті.
Қазіргі таңда облыс аумағында 11 туроператор, 45 туристік агенттік және 43 сертификатталған гид қызмет көрсетуде. Туристерге көрсетілетін қызмет сапасын арттыру мақсатында гидтердің біліктілігін жетілдіру, сервистік мәдениетті қалыптастыру, бірыңғай дерекқор мен гидтерге арналған арнайы чат-ботты дамыту бағытында жұмыстар жүргізілуде.
Түркістан халықаралық әуежайы арқылы бүгінде 9 бағыт бойынша тұрақты әуе қатынасы жүзеге асырылуда. Оның ішінде 7 бағыт – ішкі, 2 бағыт – халықаралық рейстер.
Түркістан облысында оқиғалық туризм де қарқынды дамып келеді. Жыл басынан бері 50-ден астам іс-шара ұйымдастырылып, оған 100 мыңға жуық адам қамтылды. Атап айтқанда, Turkistan Night Run халықаралық жүгіру жарысы, Ethno Fashion Show, қолөнершілер көрмелері, TEDx Turkistan конференциясы, бизнес форумдар мен түрлі шеберлік сабақтары өткізілді.
Бүгінде Түркістан облысында туризмді дамыту бағытында бірқатар ірі жобалар жүзеге асырылып, жаңа бастамалар қолға алынуда. Нәтижесінде өңірдің туристік әлеуеті артып, Түркістан халықаралық деңгейдегі тартымды туристік орталық ретінде дамуын жалғастыруда.
Айта кетейік, биыл Түркістан облысында инвестицияларды тарту индикаторы 1 трлн 783,9 млрд теңге көлемінде бекітілген. Осы жылдың 5 айының қорытындысымен 614,2 млрд теңге инвестиция бағытталып, өсім 150,5%-ды құрады. Ал 2025 жылдың қорытындысымен тікелей шетелдік инвестициялар көлемі 1 млрд 998,2 млн АҚШ долларын құрап, жылдық жоспар 4 есе жоғары орындалды. Бұл көрсеткіш бойынша Түркістан облысы елімізде 1 орында.
Облыста 2026-2029 жылдар аралығында жүзеге асырылатын 2,8 трлн теңгеге 122 инвестициялық жобаның пулы қалыптастырылды. Бұл жобалар арқылы 17820 жұмыс орнын құру көзделуде. Оның ішінде, шетелдік капиталдың қатысуымен жалпы құны 608,9 млрд теңгеге 30 инвестициялық жоба іске асырылып жатыр.
Жобалар толық іске қосылғанда 7 799 жұмыс орны құрылмақ. Биыл 369,4 млрд теңгеге 67 инвестициялық жоба іріктелген. 5 айдың қорытындысымен жалпы құны 42,4 млрд теңгеге 11 инвестициялық жоба іске қосылды. Нәтижесінде өңірдің экономикалық даму қарқыны жоғарылап, 407 жұмыс орны ашылды.
