Әділетті Қазақстанды құру – тек саяси реформалармен шектелмейтін, әр азаматтың күнделікті өміріне оң өзгеріс әкелуге бағытталған маңызды міндет. Кентау қаласында да осы бағыттағы жұмыстар кезең-кезеңімен жүзеге асырылып келеді. Ең басты басымдық – халықтың әл-ауқатын арттыру, инфрақұрылымды жақсарту, әлеуметтік мәселелерді шешу және азаматтардың өтініш-тілегіне дер кезінде жауап беру. Кентаудың әлеуметтік нысандарын дамыту, инженерлік инфрақұрылымды жаңғырту, абаттандыру, жұмыспен қамту және әлеуметтік қолдау шараларын жетілдіру – қаланың тұрақты дамуына бағытталған нақты қадамдар.
Осы орайда Кентау қаласында «Қазақстан коммуналдық жүйелері» компаниялар тобына кіретін «Оңтүстік Жарық Транзит» ЖШС-нің Кентау қаласы электр желілері қызметкерлері инвестициялық бағдарлама аясында күрделі және ағымдағы жөндеу жұмыстарын жүргізуде. Жұмыс барысында Кентау қаласында орналасқан МТП-14, ТП-23, ТП-24, ТП-96, ТП-4, ТП-65, ТП-66, КТПН-78, ТП-74 және КТПН-39 10/6/0,4 кВ трансформаторлық қосалқы станцияларында кешенді жаңғырту жұмыстары жүргізілді. Халыққа сапалы қызмет көрсету – басты талап. Сондықтан электрмен жабдықтаудағы ақауларды жедел жою, желілердің техникалық жағдайын тұрақты бақылау және жаңғырту жұмыстарын сапалы орындау – жауапты мекемелердің негізгі міндеті.
Қала әкімі Жандос Тасов қаланы сапалы электр энергиясымен қамту бағытында атқарылып жатқан жұмыстарды бақылады. Жауапты мекеме директоры Бағлан Мырзахметов жыл басынан бері жүргізіліп жатқан жұмыстарды баяндап, алдағы уақытта жүзеге асырылатын жобалармен таныстырды. Қала басшысы тұрғындарды сапалы электр энергиясымен қамтамасыз ету бағытындағы жұмыстарды жүйелеп, сапалы атқаруды тапсырды.
- Кентау қаласының тұрақты дамуы үшін сапалы әрі үздіксіз электр энергиясымен қамтамасыз ету – маңызды міндеттердің бірі. Бүгінде қалада электр желілерінің техникалық жағдайын жақсарту, тозығы жеткен жабдықтарды ауыстыру және электрмен қамту жүйесінің сенімділігін арттыру бағытында нақты жұмыстар атқарылуда. Бұл жұмыстар электр энергиясының кернеу сапасын арттырып, апаттық жағдайлардың алдын алуға мүмкіндік береді. Әділетті қоғамның негізі – заң үстемдігі, ашықтық, жауапкершілік және халықпен тұрақты байланыс. Сондықтан тұрғындардың ұсыныстары мен көтерген мәселелерін тыңдау, олардың шешілу барысын бақылау – мемлекеттік басқарудың маңызды бөлігі. Мемлекет басшысы айқындаған реформалардың түпкі мақсаты – азамат пен мемлекет арасындағы өзара сенімді нығайтып, әділетті әрі жауапты қоғам қалыптастыру. Соның ішінде біз тұрғындарды сапалы электр энергиясымен қамту жұмыстарын қолға алып, сапалы қызмет көрсетуді жоспарлап отырмыз. Кентаудың әрбір тұрғыны үшін қолайлы орта қалыптастыру – ортақ міндетіміз. Бұл бағыттағы жұмыс алдағы уақытта да жүйелі түрде жалғаса береді,-деді қала әкімі Жандос Тасов.
Қаладағы электр желілерін жаңғырту барысында күштік трансформаторлар мен электр жабдықтарына техникалық қызмет көрсетіліп, тозығы жеткен жабдықтар ауыстырылды, тарату құрылғылары ретке келтіріліп, қосалқы станциялардың техникалық жай-күйі жақсартылды. Аталған жұмыстар электр жүктемесінің артуына байланысты туындайтын тәуекелдердің алдын алуға, тұтынушыларға берілетін электр энергиясының кернеу сапасы мен сенімділігін арттыруға, сондай-ақ апаттық жағдайлардың туындау ықтималдығын төмендетуге бағытталған. «Оңтүстік Жарық Транзит» ЖШС Кентау электр желілері алдағы уақытта да электр желілерін жаңғырту және жөндеу жұмыстарын кезең-кезеңімен жалғастырып, өңір тұрғындарын сапалы әрі тұрақты электр энергиясымен қамтамасыз ету бағытындағы жұмыстарды жүйелі түрде жүзеге асыратын болады. Әділетті Қазақстан – әр азаматтың құқығы қорғалған, еңбегі бағаланған, мүмкіндігі тең қоғам.
Айта кетейік, Кентау қаласы мен оған қарасты елді мекендердегі электр инфрақұрылымын кезең-кезеңімен жаңарту көзделген. Атап айтқанда, тозу деңгейі жоғары қосалқы станциялар мен электр желілерін қайта жаңғырту – жүйенің ұзақ мерзімді тұрақтылығын қамтамасыз етудің маңызды қадамы. Кентау тұрғындары үшін тұрақты жарық, қауіпсіз инфрақұрылым және жайлы өмір сүру жағдайын қалыптастыру бағытындағы жұмыстар жүйелі түрде жалғаса береді. Өйткені сапалы инфрақұрылым – қаланың тұрақты дамуының негізі!
