Қазығұрт ауданында тұрғындардың қауіпсіздігін қамтамасыз ету және кәмелетке толмағандар арасындағы құқықбұзушылықтың алдын алу, интернет кеңістігіндегі түрлі қауіп-қатерлердің алдын алу бағытында жүйелі жұмыстар атқарылуда. Аудан аумағында рейдтік іс-шаралар тұрақты түрде ұйымдастырылып, тұрғындар мен кәсіпкерлік нысандарға ақпараттық-түсіндіру жұмыстары жүргізіледі. Әсіресе интернет алаяқтығы, жалған сілтемелер, күмәнді қоңыраулар мен хабарламалар арқылы азаматтардың жеке деректері мен қаражатын иемдену әрекеттерінің алдын алуға басымдық берілуде. Осыған орай, Қазығұрт ауданында қауіпсіздікті қамтамасыз ету мақсатында аудандық полиция бөлімі мен «Жастар ресурстық орталығы» КММ бірлесіп түнгі рейдтік іс-шаралар өткізді.
Рейд барысында аудан орталығындағы саябақтар, дәмханалар, сауда орындары және жастар көп шоғырланатын орындар тексерілді. Нәтижесінде түнгі уақытта заңды өкілдерінің қарауынсыз жүрген кәмелетке толмаған жасөспірімдер анықталып, олардың ата-аналарына қолданыстағы заң талаптары түсіндіріліп, профилактикалық шаралар қабылданды. Бұдан өзге, қазіргі таңда цифрландырумен қатар киберқауіпсіздік мәселесі де айрықша маңызға ие. Интернеттегі алаяқтықтың алдын алу, жеке деректерді қорғау, күмәнді сілтемелер мен хабарламалардан сақтану, ақпараттық жүйелерді қауіпсіз пайдалану жөнінде тұрғындар арасында түсіндіру жұмыстары жүргізілуде. Әсіресе жастар мен әлеуметтік осал топтардың цифрлық қауіпсіздік мәдениетін қалыптастыру – маңызды міндет.
Сондай-ақ Сарапхана, Қарабау, Жаңабазар және Алтынтөбе ауылдық округтерінде орналасқан дәмханалар, ойын-сауық орындары, бильярд клубтары мен сауда нысандарында түсіндіру жұмыстары жүргізілді. Кәсіпкерлерге кәмелетке толмағандарға қатысты заң талаптарын сақтау қажеттігі ескертілді. Балалардың амандығы мен қауіпсіздігі – бәрімізге ортақ жауапкершілік. Балаларыңыздың бос уақытын бақылауда ұстап, олардың заң талаптарын сақтауына ерекше көңіл бөліңіздер. Әрбір ата-ананың жауапкершілігі – баланың жарқын болашағының кепілі.
Сонымен қатар, қазіргі таңда киберқауіпсіздік – тек мамандардың ғана емес, әрбір азаматтың ортақ жауапкершілігі. Осыған байланысты халыққа жеке мәліметтерді, банк картасының деректерін және SMS арқылы келетін құпия кодтарды бөгде адамдарға бермеу, күмәнді сілтемелерге өтпеу және белгісіз қосымшаларды жүктемеу қажеттігі түсіндірілуде. Сонымен қатар, цифрлық технологияларды қауіпсіз пайдалану мәдениетін қалыптастыру, тұрғындардың киберсауаттылығын арттыру және интернеттегі алаяқтықтың алдын алу бойынша ақпараттық жұмыстар тұрақты түрде жалғасуда. Киберқауіпсіздік – цифрлық қоғамның басты талаптарының бірі. Сондықтан сақтық шараларын сақтау және ақпараттық қауіпсіздік ережелерін білу – әр азаматтың өз қауіпсіздігін қорғаудағы маңызды қадамы.
